Blog

تطعيمات الكلاب واسعارها ومواعيدها (دليل طبي مبسط لـ 2024)

نشر بواسطة admin admin

Aug 08 2017

تعرف ايه عن تطعيمات الكلاب؟

فيه بعض أصحاب الكلاب شايفين إن التطعيمات والتحصينات ملهاش قيمة، ولكن!

تطعيمات الكلاب مهمة جدا عشان ببساطة بتحمي كلبك من أمراض ممكن تسبب الوفاة لا قدر الله!

تطعيمات الكلاب مش حاجه ثانويّة، لكن أهم شئ في حياه اي أليف وخصوصا في بدايات عمره!

في المقال ده هنشرح لك كل حاجة انت محتاج تعرفها عن تطعيمات الكلاب …

كيف تعمل تطعيمات الكلاب داخل جسم كلبك؟

فاكر زمان وإنت صغير في المدرسة، كانت الدكتورة اللي في المدرسة تيجي وتدي الفصل كله تطعيم ضد مرض الحصبة.

اهو اللي انت اخدته ده عبارة عن صورة مُصغرة من مرض الحصبة نفسه!

وده علشان الجسم ياخد الصورة دي ويخزنها عنده ويكوّن أجسام مضادة للمرض …

فأول ما يجي المرض يهاجمك … تلاقي التحصين اشتغل ويبدأ يهاجم المرض ويطلع أجسام مضادة ويحميك من المرض.

وده بالظبط نفس اللي بيحصل في جسم الأليف بتاعك …

انت بالتحصين بتديله صورة مُصغرة من فيروس البارفو مثلا (اللي موجود في التطعيم الثنائي والخماسي والثماني)!

والجسم يبدأ يصوره ويخزنه عنده في خلايا الدم البيضاء (Memory Cell) …

عشان وقت ما أليفك يكون موجود في مكان فيه عدوي، أو تتنقله من أليف تاني .. جهازه المناعي يبدأ يفتكر صورة التحصين اللي أخده، و يطلع الأجسام المضادة للمرض.

طب ايه هي الأمراض اللي التطعيمات بتحمي كلبي منها؟

تطعيمات الكلاب: حصانة ضد أخطر 3 أمراض!

الفيروسات أحد أخطر مسببات الأمراض، وكده كده موجودة حوالينا وممكن تصيب الأليف في أي وقت!

وخطورة الفيروسات إن ملهاش علاج، بيتم علاج الاعراض بس لو لا قدر الله اليفك تم اصابته بمرض فيروسي، عشان كده لازم نحصن الأليف منها.

الوقاية خير من العلاج!

لازم تمشي بالمبدأ ده مع اليفك …

عشان كده لازم نسبق الفيروس بخطوة ونحصن الاليف ونرفع جهاز المناعة عشان يكون جاهز وقت لما الفيروس يهجم.

تطعيمات الكلاب بتحمي الكلب من 3 امراض فيروسية خطيرة، وهما:

1- فيروس بارفو

أحد أشهر وأخطر الأمراض الفيروسية اللي بتصيب الكلاب هي مرض فيروس البارفو!

وخطورته تكمن ان بينتقل بالعدوى من كلب للـ تاني، وبيهاجم الجهاز الهضمي للكلب … بيسبب له ترجيع، واسهال مُدمم، وسخونة.

سهل جداً يجي للكلب لو مناعته وقعت، أو لو متحصنش.

ملحوظة: اكتر كلب عرضة للإصابة بالفيروس ده هو كلب الـ Rottweiler لأن مناعته بتقع بسهولة …

يعنى خد بالك لو اتحط تحت ضغط مناعته بتقع.

لو جاتله عدوي مقدرش يهاجمها مناعته بتقع.

لو كان أكله ضعيف و مفيهوش كل العناصر اللي هو محتاجها مناعته بتقع.

2- مرض الـ Distemper - ديستمبر

شبيه بالـ Parvo، ولكنه مش بيصيب الجهاز الهضمي بس … بيصيب كمان الجهاز التنفسي و العصبي.

3- السعار أو الـ Rabies

مرض السعار من الأمراض الفيروسية الخطيرة، لأنها بتتنقل كمان للإنسان.

وطبعا بيتنقل من كلب للتاني … فخلي بالك اذا عرفت ان في كلب عنده مرض من الأمراض دي موجود فى نفس المكان اللي كلبك فيه … ابعده فوراً.

مواعيد وبروتوكول تطعيمات الكلاب

طبقا لترشيحات الـ WSAVA ودي اكبر منظمة دولية للطب البيطري هنقولك نظام وبروتوكول تقدر تعتمد عليه بعد مراجعته مع طبيبك البيطري وده لان كل كلب ليه حالته الخاصة!

1- بنبدأ عند عُمر 28 يوم بالتحصين الثنائي (فيه أكتر مرضين بيصيبوا الكلاب في عمر صغير)، وكأنك بتقول لجهاز أليفك المناعي أبدأ أنشط .

2- عند عُمر 35 يوم، بنعلي شوية و بندي التحصين الخُماسي.

3- عند عُمر 45 يوم، خلاص بقي قادر يستقبل باقي التحصينات .. فـ بياخد واحد من دول: الخماسي أو السُباعي أو الثماني

وبنفضل الخماسي والسباعي، ثم يُكرر بعدها بـ 3 أسابيع.

4- أما عند عُمر 3 -6 شهور … أهم تحصين و هو تطعيم السعار للكلاب و بيتكرر مرة كل سنة.

ملحوظة: أي تحصين مكان حقنه بيكون تحت الجلد، فـ خد بالك و الدكتور بيدي لأليفك التحصين عشان ميدهوش في مكان غلط ويؤذي أليفك.

وبس كدة …

ماذا عن تحصينات الديدان والحشرات عند الكلاب

مهم جداً تدي جرعة الديدان بعد 14 يوم من يوم ما أدتها له أول مرة، عشان تقضي على دورة حياة الدودة كاملة.

اللي عبارة عن Adult ثم Egg ثم Larve.

في أول جرعة بتقضي علي الـ ِAdult، لكن الـ Egg مازالت موجودة، فنستني لحد ما تفقس وتديني الـ Larva و ده في اليوم الـ 14 اللي بندي فيه الجرعة التانية .. فكده يبقى قضيت على كل الديدان الموجودة.

وعشان كده مينفعش تأخر يوم، و الا هتضطر تعيد من الأول و جديد.