fbpx

 

حصن أليفك : الوقاية خير من العلاج

 

  • الله يا سالي كلبك عسول أوي، و بيحب اللعب .. عنده كام سنه ؟

  • يدوب شهر و نص 😀

  • طب حصنتيه ؟

  • لأ .. شايفه ملهاش لازمة.

  • بتهزري .. ده مُهم جداً يا بنتي ! .. و خصوصاً في نوع كلبك عشان هيحميه من أمراض تموّت.

في ناس كتير زي سالي، شايفين ان التحصين في حياة الأليف حاجه ثانويّة ، لكنه أهم شئ في حياه اي أليف ، و بيحميه من أمراض ،و بيجنبك قلق أنت في غنى عنه !

 

التحصين بيشتغل ازاى جوه جسم الأليف

 

طيب ايه فكرة التحصين؟


فاكر زمان و إنت صغير في المدرسة، كانت الدكتورة اللي في المدرسة تيجي و تدي الفصل كله  تطعيم ضد مرض الحصبة.

تعرف، اللي اخدته ده عبارة عن صورة مُصغرة من مرض الحصبة نفسه، علشان الجسم ياخد الصورة دي يخزنها عنده و يكوّن أجسام مضادة ليه !

فـ أول ما يجي المرض يهاجمك .. تلاقي التحصين أشتغل و يقول بس هو ده شبه اللي عندي .. و يبدأ يهاجمه و يطلع أجسام مضادة و يحميك من المرض.

و ده بالظبط نفس اللي بيحصل في جسم الأليف بتاعك، بتديلة صورة مُصغرة من فيروس البارفو مثلا ( اللي موجود في التحصين الثنائي و الخماسي و الثماني )، و الجسم يبدأ يصوره و يخزنه عنده في خلايا الدم البيضاء (Memory cell).

عشان وقت ما أليفك يكون موجود في مكان فيه عدوي، أو تتنقله من أليف تاني .. جهازه المناعي يبدأ يفتكر صورة التحصين اللي أخده، و يطلع الاجسام المضادة للمرض.


الأمراض اللي بتحصن أليفك منها


الفيروسات كده كده موجودة حوالينا و ممكن تصيب الأليف في أي وقت، والفيروسات عامةً ملهاش علاج عشان كده لازم نحصن الأليف منها.

الوقاية خير من العلاج ، عشان كده لازم نسبق الفيروس بخطوة ونحصن الاليف ونرفع جهاز المناعة عشان يكون جاهز وقت لاما الفيروس يهجم.

في ايدك انت تحمي الاليف وفى ايدك تموته ، ده قرارك.  

 


الامراض دي بتختلف من الكلاب لـ القطط.

في الكلاب :


1- مرض الـ Parvo

 

  • من الأمراض الفيروسية المنتشرة والمُميته

  • بينتقل بالعدوى من كلب للـ تاني.

  • بيهاجم الجهاز الهضمي للكلب.

  • بيسبب له ترجيع، واسهال مُدمم، و سخونة.

  • سهل جداً يجي للكلب  لو مناعته وقعت،  أو لو متحصنش.

ملحوظة: اكتر كلب عرضة للإصابة بالفيروس ده هو كلب الـ Rottweiler، لأن مناعته بتقع بسهولة.

يعنى خد بالك لو اتحط تحت ضغط مناعته بتقع.

لو جاتله عدوي مقدرش يهاجمها مناعته بتقع.

لو كان أكله ضعيف و مفيهوش كل العناصر اللي هو محتاجها مناعته بتقع.

2- مرض الـ Distemper، شبيه بالـ Parvo، ولكنه مش بيصيب الجهاز الهضمي بس ! .. بيصيب كمان الجهاز التنفسي و العصبي.

3- السعار أو الـ Rabies من الأمراض الفيروسية الخطيرة، لأنها بتتنقل كمان للإنسان.

والأمراض دي بتتنقل من كلب للتاني ..  فخلي بالك اذا عرفت ان في كلب في المكان اللي كلبك فيه عنده مرض من الأمراض دي ، ابعده فوراً.

 

أما للقطط :


1- مرض الـ Panleukopenia و ده شبيه بالـ parvo عند الكلاب و ليه نفس الاعراض بيسبب له ترجيع، و اسهال مُدمم، و سخونة.

2- مرض بيصيب الجهاز التنفسي، اسمه الـ Calicivirus، و بينتج عنه قرح في فم أو لسان و أنف القطة.

 

مواعيد التحصين

دلوقتي أكيد بتسأل علي مواعيد التحصين. مش صح ؟!

طيب هي بتختلف من الكلاب في القطط زي ما هنشوف.


في الكلاب

زي ما انت عارف ان كل شيخ وليه طريقة ، فكل دكتور وله نظام عشان يحصن بيه الأليف.

ملحوظة: مفيش نظام فيهم غلط ولكن فيه نظام مفيد لاليف ومش مفيد للتاني.

احنا بقي في Happet ده النظام اللي بنحصن بيه في أي Home visit و ممكن يتغير علي حسب مصلحة الأليف.


1- في الأول بنبدأ عند عُمر 28 يوم بالتحصين الثنائي (فيه أكتر مرضين بيصيبوا الكلاب في عمر صغير )، و كانك بتقول لجهاز أليفك المناعي أبدأ أنشط .

2- بعديها عند عُمر 35 يوم، بنعلي شوية و بندي التحصين الخُماسي.  

 
3- و أما عند عُمر 45 يوم، خلاص بقي قادر يستقبل باقي التحصينات .. فـ بياخد واحد  من دول، الخماسي أو السُباعي أو الثماني و بنفضل الخماسي والسباعي. ويكرر بعدها بـ 3 أسابيع .
4- أما عند عُمر 3 -6 شهور .. أهم تحصين و هو السعار و بيتكرر مرة كل سنة.

أما في القطط :


تتلخص تحصيناتها في تحصينين بس و يتكرروا :


1- تحصين الرباعي و بيبدأ عند عُمر شهرين، و بيتكرر بعدها بـ 3 أسابيع.
2- تحصين السعار عند عُمر 3-6 شهور، و بيُكرر كُل سنه.

 





ملحوظة:

* أي تحصين مكان حقنه بيكون تحت الجلد، فـ خد بالك و الدكتور بيدي لأليفك التحصين عشان ميدهوش في مكان غلط و يأذي أليفك.

*حاجه كمان، مهم جداً تدي جرعة الديدان بعد 14 يوم من يوم ما أدتها له أول مرة،عشان تقضي علي دورة حياه الدودة كاملة .اللي عبارة عن  Adult ثم Egg ثم Larve.

في أول جرعة بتقضي علي الـ ِAdult، لكن الـ egg مازالت موجوده، فنستني لحد ما تفقس و تديني الـ Larva و ده في اليوم الـ 14 اللي بندي فيه الجرعة التانية .. فكده يبقي قضيت علي كل الديدان الموجودة.

و عشان كده مينفعش تأخر يوم، و الا هتضطر تعيد من الأول و جديد.

طب ليه نستني للعمر ده عشان أحصن أليفي ؟

الأليف لما بيتولد بيرضع من لبن الأم ” colostrum”، بيبقي فيه الأجسام المناعية اللي بياخدها المولود من مامته.

و بتبدأ تقل عند الأسبوع الـ 12 من عمر المولود .. فـ هنا جه دور التحصين اللي بيخلي جسم الأليف المولود يكوّن أجسام مناعية خاصة بيه بدل اللي أخدها من مامته و بدأت تقل.




و عشان صحة أليفك و تخلي بالك منه و متنساش معاد تحصينه، تقدر تعمل معاد تحصينه reminder علي الموبايل بتاعك. أو تسيبلنا إحنا المُهمة دي ناخد بالنا منه.

 

أطباء هابت موجودين دايما جنبك طول الوقت , تقدر تستشيرنا في اي وقت علي رقم 0102233450 وهنكون دايما موجودين لمساعدتك

و في أي وقت جه معاد التحصين و مش قادر تنزل من البيت، هتلاقينا عندك عشان إحنا كمان بنهتم بيه و بصحته من خلال خدمة الـ Home visit.

او تنورنا في العياده في  فيلا 274, الياسمين 3, التجمع الأول, القاهرة الجديدة.


العنوان علي جوجل هنا : https://goo.gl/maps/bJHhEEKSLHS2

تقدر سجل من هنا.


 Get Home Visit 

Leave a Reply

Your email address will not be published. Required fields are marked *