fbpx
 
 كلبك و الانتفاخ

– تكونش بالونة و عاملة نفسها كلب –

 


* الو، الحقيني يا سالي .. كلبي شيتوس تعبان اوي و مش قادر يتحرك و بطنة منفوخة !
– اهدي بس يا هبه و قوليلي ايه اللي حصل؟  
* امبارح اكل كويس و نام، صحيت النهاردة الصبح لقيته تعبان أوي كده !
– طيب اهدي ! .. هكلم الدكتور حالاً و أجيبه معايا و أجيلك.

….

مُعظم الأمراض اللي بتصيب البني آدمين أو الحيوانات بتكون مرض فيروسي أو بكتيري.
لكن الإنتفاخ أسبابه بتختلف، ومنها التغذية. و هنتكلم عن كل سبب بالتفصيل.

بس خلونا الأول نِعرف ايه الانتفاخ ده واعراضه ايه …

الانتفاخ و أعراضه عند الكلاب

الانتفاخ عبارة عن زيادة ملحوظة في حجم بطن الكلب وممكن تمتد للصدر. و كل ما تم تشخيصه و علاجه أسرع، كل ما كان أحسن لصحه الكلب.

فـ هتلاحظ ان بطنه كبرت فجأه، و هيبقي قلقان و بيتحرك كتير “restless”،  و يبدأ يبص كل شوية علي منطقة البطن ..

مش بس كده !

ده هتلاقيه كمان بيحاول يرجّع كل 30 دقيقة، و دي بتبقي محاولة منه انه يخرج اللي مضايقه في بطنه بس محاولته بتبوء بالفشل.

وده كانت الاعراض اللي ممكن تظهر عليه و تلاحظها من غير ما تقرب منه.

اما بقي لو قربت من الكلب تقدر تعمل حاجه اسمها “Abdominal Percussion ” يعني  تخبط علي بطن الكلب و الصوت اللي هتسمعه، هيخليك تقرب من سبب الانتفاخ، لأنه ليه أسباب كتير.  

أسباب الانتفاخ

فـ لو خبطت علي بطنه و سمعت زي صوت الطبلة، يبقي الانتفاخ بسبب الهوا.
اما لو خبطت عليها و سمعت صوت مكتوم، يبقي اكل متجمع في بطنه ..

و لكن كل سبب و ليه عوامل، فـ اتقسمت لعوامل بيئية ،فسيولوجية، تغذية .

  
فالعوامل البيئية زي :

* ان الكلب اتحط تحت ضغط كبير لفترة طويلة سواء غير مكانه و مش مستريح في المكان الجديد، او اتعامل بطريقة فيها قسوة.

* الكلب جري كتير و عمل مجهود فوق طاقته، فـ ده هيؤدي ان يحصل اضطرابات في عملية الهضم، بالتالي الاكل “Food” هيتجمع في البطن و يعمل انتفاخ.  

العوامل الفسيولوجية :

اذا كانت الكلبة حامل، فطبيعي حجم البطن يكبر بسبب الجنين “Foetus“.

و متعتبرش الحالة دي حالة مرضية، الا لو زاد حجم البطن زيادة عن اللزوم و ظهر بعض اعراض المرض علي الكلبة.

عوامل التغذية :

و دي تُعتبر من أكتر الاسباب اللي ممكن تؤدي للـ انتفاخ، لأن زي ما قولنا قبل كده في مقال فات ان كل عمر و ليه كمية مُعينة من الأكل ياكلها في اليوم.

فـ لو زادت الكمية دي،هتظهر مشاكل كتير.

1- منها صعوبة في الهضم، فـ يبدأ يتجمع البراز “Faeces” و يكبر حجم البطن.

2- لو بياكل اكل فيه كمية بروتين كتير-رغم أهميته-  بس لو أكتر من اللي بيحتاجها الكلب، خصوصاً لو كان ذكر، هيساعد انه يكوّن عنده حصاوي و يتجمع عنده البول “Fluid“، فحجم المثانة يكبر ويضغط علي البطن.

فـ هنا مهم جداً نهتم بجودة الـ Dry Food اللي بنديه للكلب و يكون فيه العناصر الغذائية مظبوطة عشان تتجنب المُشكلة دي .   

3- نقص في انزيم الـ Trypsin اللي بيساعد علي الهضم، و الانزيم ده موجود في اللحمة. إذا تقدر تديله لحمة مرتين في الأسبوع.


و دي كانت الأسباب الرئيسية للانتفاخ، لكن في اسباب تانية فرعية زي :


* ان الكلب عنده تضخم في الكبد أو الطحال.

* او لو حصل التفاف في امعاء الكلب “Flatus” اللي بيساعد علي دخول الهوا الكتير للمعدة فيظهر الانتفاخ ..

* او لو حصل التفاف في معدته “Gastric dilatation ” نتيجه انه أكل كتير و بعدها عمل مجهود زيادة و رجع شرب مايه كتير.

بس خد بالك الحالات دي بتبقي خطر و بتحتاج تدخل جراحي سريع . عشان كده مهم جداً انك تلحق كلبك لو ظهرت عليه اي عرض من الاعراض اللي قولناها.

….

بعد كل الاسباب دي، ظهراختصار الـ 5F’s بيجمع اسباب الانتفاخ و هي :
                                         
                             (Fluids , Food , Foetus ,Faeces,Flatus)



الوقاية خير من العلاج

– طب عشان تحمي كلبك و تبعد نفسك عن القلق ده، تعمل ايه ؟

تقدر تحميه في الـ7 نقط دول :

1- تحاول تقلل الضغط علي كلبك و تبعده عن المجهود الزيادة.


2- شربه مايه كتير، ما عدا قبل الاكل و بعده.


3- حاول تحطله كميات من الاكل مناسبة لعمره.

 
4- في بعض المُكملات الغذائية فيها بكتريا زي Purina Fortiflora و Vetri-Science Probiotic ،و دي من انواع البكتريا المُفيدة اللي بتساعد علي الهضم.


5- حاول تقلل الأكل اللي فيه كربوهيدرات و فول الصويا.


6- متسمحش لكلبك انه ياكل بسرعة، عشان نتيجه التصرف ده تجمع الاكل في بطنه ، فـ بالتالي هيبقي صعب هضمه.

7- و امنع كلبك من انه يشرب مايه بسرعة.

 

 

 

و ده طبعاً لو المُشكلة متخصش الكبد و الطحال زي ما قولنا فوق

 

 

 

….

 



.دائما و ابدا افتكر ان كل ما تلحق المرض في اوله، كل ما تتجنب مشاكل كتير. زي ما هبه عملت مع كلبها اول ما شافته تعبان حاولت تتصرف و جابتله دكتور

أنت كمان لو كلبك تعب أو أشتكي من حاجه ، هتلاقينا موجودين جنبك و جاهزين في أي وقت
Get Home Visit.. تقدر تسجل من هنا ،Home Visit من خلال خدمة الـ

 

 

Leave a Reply

Your email address will not be published. Required fields are marked *